النصيب
يا ويل اللي يستحي من جروحه
ويتكدر خاطره من قولة قايل
أسرار قلبه
عالعين مفضـوحه
قــراها اللي ما
يفتل فتايل
أعشق والعاشق
النجوم طموحه
والعفـة تاجه
تزين الحمايل
يا ربي أرع قلبي وصدق بوحه
ما بيدي عشق بنت الأصايل
فالحب ماله أسباب مشروحه
والحب يالحبيب ما له دلايل
الحب طير طاير ترتجف جنوحه
إن جاك تشوف من الشوق هوايل
مشاعر على درب الشوق مذبوحة
ذبحها الشوق بمزراق طايل
هل أخطيت بعشق وجوه صبوحه
رايتهم بيضاء بزين الفعايل
لا تزعل فالمحبة بك ممدوحة
وعيني ما شافت لطيبك مثايل
لا تزعل من اللي شافك بروحه
فالروح تشوف حسن الشمايل
والزعل ما شفى قلب من قروحه
والنصيب يا جمع يا فرق قبايل
والقلب ما يرد النصيب بنوحه
ولا يرده دمع من العين سايل
ما ينفع ذيب جريح قوة جوحه
وما تنفعه شدة هموم ثقايل
يارب من يترجاك تكثر ربوحه
اترجاك تسعد بنت الأصايل
والشهادة خلها لبدر طموحه
أكتبها لبدر من عندك جمايل
بقلم
بدرالدين بن جرمي الترباني
في
يوم 10/6/2010
ليست هناك تعليقات:
إرسال تعليق
نشكركم على المتابعة ونرجو التواصل والتعليق
بدرالدين بن جرمي